L-Iskema għall-Iskejjel tal-UE, hija inizzjativa importanti li tappoġġja d-distribuzzjoni tal-ħalib, frott u ħaxix frisk lil miljuni ta’ tfal, mill-iskejjel primarji sa dawk sekondarji li jipparteċipaw madwar l-UE.
Din l-iskema tindirizza l-għan ta’ konsum adegwat tal-frott, ħxejjex, u ħalib fl-UE, filwaqt li tikkumbatti ż-żieda tal-konsum ta’ ikel proċessat li għandu eċċess ta’ zokkor, melħ, xaħam u addittivi. L-UE qed timmira li tiġġieled il-problema tal-obeżità li dejjem qed tiżdied, partikolarment fit-tfal, billi tippromwovi dieta u stil ta’ ħajja li hi tajba għas-saħħa.
L-iskema tiffaċilita d-distribuzzjoni ta’ frott, ħxejjex, u ħalib fl-iskejjel direttament lill–istudenti. L-Istati Membri tal-UE jikkollaboraw mal-awtoritajiet tas-saħħa u tan-nutrizzjoni sabiex tiġi approvata lista ta’ prodotti għat-tqassim, bi prijorità għall-ikel u l-ħalib frisk u naturali. Prodotti pproċessati xorta jistgħu jiġu inklużi għal dieta varjata, b’kunsiderazzjonijiet dwar staġonalità, disponibbiltà tal-prodotti u l-impatt ambjentali li jista’ jkollhom.
Apparti d-distribuzzjoni, din l-iskema tappoġġja wkoll miżuri edukazzjonali, bħal tagħlim, żjariet f’irziezet, u sessjonijiet u avvenimenti oħra rilevanti. L-għan ta’ dawn l-attivitajiet huwa li jerġgħu jgħaqdu t-tfal mal-agrikultura u jrawmu fihom drawwiet alimentari tajbin, fejn jiġu kopruti suġġetti bħal ktajjen alimentari lokali, il-biedja organika, is-sostenibbiltà, u l-ħela tal-ikel.
Parti mill-fondi huma wkoll allokati għal attivitajiet ta’ informazzjoni biex tiżdied il-viżibbiltà ta’ din l-iskema, flimkien ma’ monitoraġġ u evalwazzjoni biex tiġi żgurata l-funzjonalità tagħha. Dan jgħin biex tinżamm il-kontabbiltà u t-trasparenza fil-kisba tal-għanijiet tal-iskema. L-Istati Membri jistgħu jaġġustaw l-allokazzjoni tal-baġit tagħhom abbażi tal-prijoritajiet u l-ħtiġijiet speċifiċi tagħhom
L-Istati Membri huma meħtieġa jiżviluppaw strateġija ta’ sitt snin fejn jistabbilixxu l-għanijiet, benefiċċji, prodotti, l-attivitajiet edukazzjonali, u l-arranġamenti għall-implimentazzjoni tal-iskema. Kull pajjiż jissorvelja u jevalwa l-iskema, u għandu jissottometti rapporti dwar dan lil Kummissjoni Ewropea. Dawn ir-rapporti jiġu ppubblikati mill-Kummissjoni, fejn ukoll jiġu pprovduti kuntatti biex tinkiseb aktar informazzjoni dwar id-dettalji tal-parteċipazzjoni u l-implimentazzjoni tal-iskema.