Skont l-Anness I tar-Regolament Delegat tal-Kummissjoni (UE) Nru 907/2014 tal-11 ta’ Marzu 2014 li jissupplimenta r-Regolament (UE) Nru 1306/2013, l-Aġenzija għall-Pagamenti Agrikoli u Rurali (ARPA) hija meħtieġa li jkollha servizz ta’ awditjar intern li jissorvelja u jevalwa kontinwament l-operazzjonijiet tal-Aġenzija. Is-servizz tal-awditjar intern huwa indipendenti milt-taqsimiet l-oħra tal-Aġenzija u jirrapporta direttament lill-Kap tal-Aġenzija. Ir-rwol tat-taqsima tal-awditjar intern huwa li tivverifika li l-proċeduri adottati mill-Aġenzija huma adegwati biex jiżguraw li l-osservanza tar-regoli Komunitarji tiġi vverifikata u li l-kontijiet ikunu preċiżi, kompluti u f’waqthom.

L-awditur intern huwa meħtieġ mir-Regolament imsemmi hawn fuq li jaħdem f ’termini ta’ pjan ta’ awditjar intern li jkopri l-kompiti kollha mwettqa mill-Aġenzija għall-Pagamenti Agrikoli u Rurali (ARPA) fuq perjodu ta’ ħames snin. Il-verifika mwettqa hija bbażata fuq kampjuni magħżula mid-diversi popolazzjonijiet li qed jiġu ttestjati. Minkejja l-fatt li mhux il-popolazzjoni kollha tiġi ttestjata, kwalunkwe dgħufija operazzjonali u ta’ kontroll toħroġ bħala riżultat dirett tal-awditu. Is-servizz tal-awditjar intern joħroġ rapport lill-Kap tal-ARPA għal kull qasam awditjat u jsiru rakkomandazzjonijiet għal titjib abbażi tas-sejbiet. Is-servizz tal-awditjar intern iwettaq awditi ta’ segwitu minn żmien għal żmien sabiex jiżgura li r-rakkomandazzjonijiet li saru ġew indirizzati mill-Aġenzija. Ix-xogħol kollu ta’ verifika jsir skont standards aċċettati internazzjonalment.

Is-servizz tal-awditjar intern huwa assenjat ukoll ir-responsabbiltà li jagħti pariri lill-maniġers dwar l-istruttura operattiva u ta’ kontroll tal-ARPA. Fl-abbozzar tad-Dikjarazzjoni ta’ Assigurazzjoni Annwali tiegħu, il-Kap ARPA jibbaża l-opinjoni tiegħu fuq ir-riżultati u r-rakkomandazzjonijiet magħmula permezz tas-servizz tal-awditjar intern. Is-servizz tal-awditjar intern huwa għalhekk għodda f’idejn il-Kap tal-ARPA li tgħinu jidentifika u jindirizza r-riskji u d-dgħufijiet li tiffaċċja l-Aġenzija.